[خالد الحربي]

وتاليها مع قلبك؟ انا ناقص وجع وجدان
دخيلك فضي السيره... تعبت انزف معاناتي

تعالي ننهي الماضي ... ويكفينا الم واحزان
ابطوي صفحة العاشق... واعيد احسب حساباتي

انا المذنب وانا المخطي وانا اااااسف انا الغلطان
ويا ليتك يا الزمن ترجع ... واكفر عن خطيئاتي

ما عاد اقوى على الظلمه ولا اقدر على الكتمان
احس انك خنقتيني !! وجت ساعة نهاياتي

نسيتي ساعة اللقيا ؟ نسيتي لمة الاحضان!
نسيتي وشكثر كنتي ... تموتي في لقاءاتي !

نسيتي من رفع قدرك ... وخلى لك مكانه وشان !
وعزيتك وعليتك .... على كل الاميراتي !

نسيتي لبسة الطرحه؟ نسيتي لبسة الفستان؟
نسيتي لبسة الخاتم .... نسيتي كل هدياتي!!

نسيتي من عجف شعرك... جدايل كنها شرطان !
وزينتك وبخرتك وقلت امرك يا مولاتي

نسيتي من ربط خصرك... وهو عينه على الرمان
ومدن صدرك تناديني ... تبي اعلن فتوحاتي

ولولا خوفي الخالق ... حبيبي ربي الرحمان
لكنت بساعتي هذي اعض اصبعي من حماقاتي

تغيرتي ولاعدتي ... مثل اول زهر عطشان
وحناني للأسف كنه ... بقايا من خرافاتي

تكبرتي وتجبرتي ... وصارت شوفتك سلطان
وانا دايم على النيه ... ما غير ارسل جواباتي

حسبتك مني وفيني ... واهمك لو اجي فرحان
ولكن شفتك بعيني ... تصدين ابتساماتي

حسبتك تفتحي قلبك ... اذا كان الوجد زعلان
ولكن ما كذب خدي ... وهو يشهد على دمعاتي

فراقك اصبح الغايه ... ولاني عالهجر ندمان
قراري بالبعد عنك ... ترى اسهل قراراتي

وداع الذل يا ذلي ... وداع الموت والأكفان
عطيتك قلبي وروحي ... ولا صنتي اماناتي

وش الحيله اذا فكر... قتيلك يهجر الأوطان
طلبتك زيدي الطعنه ... ابي اشعر بنوباتي

وعلى شاني اذا باقي ... بداخل حضرتك ايمان
ابيها من ورى ظهري .... وانا اتلو صلاواتي

وخنجر طعنتك يصرخ ... يكفيه الم ياخوان
وانا اخر حكي عندي ... فمان الله يا طعناتي

يا من تقدر تعوضني ... عن الضيقه وعن الاحزان
بشرط اني انا الكوكب وهي ابعد مجراتي

يا من تقدر تخليني .... كبير اعظم ملوك الجان
لجل يصعب تحضرني ... قبل تطلب قريناتي

سمعتوا من قبل عنها ... سمعتوا معشر النسوان؟
بعيده للأسف عنكم ... مثل قلبي ودقاتي

أمل..الجوهره.. ريم..ساره ... وأشجان
اسامي تحيي الميت ... ولكن اهلها امواتي

يجوني في صور شتى .... ومعظمها صور غربان
وانا عذري مثل ماهو .... صديقاتي ... صديقاتي

خلاص بذمتي والله ... ما عاد ارجع الى الادمان
عرفت ان الغدر انثى ..... وانا اجمع علاماتي

صفر طيبي.. صفر صدقي ... صفر حتى مع الاحسان
صفر شعري .... وأقلامي ... وممحاتي ومبراتي

صفر ليلي... صفر ويلي .. صفر خافق نطر سهران
صفر دمعي ... صفر شمعي ... صفر بوحي ونبراتي

صفر شوقي.. صفر عشقي ... صفر مغرم.. صفر ولهان
صفر وجدي .. صفر شهدي .. صفر نوحي وزفراتي

بعد كل العمر هذا ... عرفت اني انا الكسلان
حسافه جتني متاخر ... مراحل اكتشافاتي

ولكن ما اقول الا ... خذوا حبي بعد قربان
حقيقه مالها معنى .... اسولف عن حكاياتي

فمان الله ... فمان الله ... فمان الله انا ذبلان
وحسافه تنوجد عذرا تشوف احرف معاناتي

قصيدي لا تواخذني ... مصيري ابعد الشيطان
يكفي اذكر اسم الله ... واجنب عن متاهاتي