لعنبو قصة غرام كلهــــا كلمتين... ابتدينا عند احبك وانتهينا عند باي
تونا ما مشينا فالهوى لو خطوتين... وانتها الموضوع كله حتى معرف وش خطاي
وانتهت قصة علاقه بكل سهوله تحكمين... وين احبك؟ وين اريدك؟ وين ساكن في حشاي؟
يمكن انك ماوفيتي يوم جيتي تعشقين...ويمكن انك تحسبين بتبعك من دون راي
ويمكن اصلا ما عشقتي كنتي تلعبين...ويمكن انك ما وصلتي في هواك لمستواي
ويمكن اني ماعرفتك فالحقيقه وش تبين...ويمكن اني خنت نفسي يوم اعطيتك وفاي
علميني في العطا والتضحيه وش تفهمين... لعنبو حيك عشانك بعت اقرب اقرباي
كنت احطك في عيوني تسرحين وتمرحين... كنت اشيل هموم قلبك وارمي همومي وراي
كنت اطير من السعاده يوم اشوفك تضحكين... كنت ذايب في هواك مثل سكر وسط ماي
كنت نايم فالعسل وارسم من الفرحه سنين... كنت اظنك قلب عاشق ماسكن وسطه سواي
ماوعيت الا وانتي في خفوقي تطعنين ...ما وعيت الا وسيفك بالحشا رايح وجاي
ورده والله ورده بس عرفتي تجرحين... ابشرك كل شي فيني جريح الا فخامة كبرياي
ماتاْثرت بغيابك وش يعني دمعتين!!... بكره انسى صدقيني وارجع بكامل قواي
ادري ان احنا افترقنا بس ابفهم حاجتين؟؟... علميني وش كسبتي ؟؟ وعلميني وش خطاي؟؟
اصلا الموضوع كله ماتعدى كلمتين...التقينا عند احبك وانتهينا عند بـــــــــــــــــاي....
تحياتي