هذا الرحيل

[مجروحه بأهدابي]

هذا الرحيل اللي حصل ماظنتي بعده لقا
خلاص فرقنا الزمن وراح كل في طريق
ماعاد ينفعني أقول الطف بحالي وارفقا
وانت الذي من غير ذنب يرتكب خنت الرفيق
أصلا من أول كل شيء عندنا مايرفقا
كانت علاقتنا على الوجدان أشبه بالحريق
جيتك وانا كلي أمل جيتك على وضح النقا
كنت احسبك صاحب وفي كنت احسبك مثل الشقيق
جيتك وانا رافع ايدي ادعي لك بطول البقا
ماكنت اظن اني اجي وتقول لي خبرك عتيق
اعطيتك القلب الحنون وغير قلبي وش بقا
واعطيتني جرح والم وهموم واحزان وضيق
واعطيتك الحب العفيف ولا لقيت الا الشقا
من كثر ماجافيتني خليت بالعهد الوثيق
واليوم لازم نفترق ونقول هذا المنطقا
اللي قدرنا نكشفه من بعد كنا مانطيق
ابغاك اذا قابلتني ماكننا كنا اصدقا
وانا كذلك باعتبر ماكنت تعني لي صديق